ချင်းမိုင် (မဇ္စျိမ) ။ ။ ကချင်လွတ်မြောက်ရေးအဖွဲ့ ဟိုပင်မြို့ ဆက်ဆံရေးရုံး တာဝန်ခံ ဗိုလ်ကြီးခေါင်လွမ်းနှင့် ဒုအရာခံဗိုလ်တဦး ဖမ်းဆီးထားရာမှ ယနေ့မနက် ထွက်ပြေးသွားကြောင်း မြောက်ပိုင်းတိုင်း စစ်ဌာနချုပ် (မပခ) က ပြောသည်ဟု ကေအိုင်အိုဘက်က သိရသည်။
ယမန်နေ့ မနက် ၁ဝ နာရီခန့်က ဟိုပင်မှ မိုးညှင်းအသွား လမ်းတွင် ဒုရဲအုပ်နှင့် အဖွဲ့က ဗိုလ်ကြီးခေါင်လွမ်း စီးလာသော ဗင်ကားနှင့်အတူ ခေါ်သွားကာ ဟိုပင်မှ ဒုအရာခံဗိုလ်နှင့် တပ်သားတဦးကိုလည်း ထိုနေ့မနက်ကပင် အာဏာပိုင်များက ဖမ်းဆီးသွားခဲ့သည်။ ယနေ့မနက်တွင် ၎င်းတို့ ထွက်ပြေးလွတ်မြောက်သွားသည်ဟု မပခ က ကေအိုင်အိုကို ဖုန်းဖြင့် အကြောင်းကြားခဲ့သည်။
စရဖ အပါအဝင် လူ ၃၀ ကျော် ၄ နာရီကြာစစ်ဆေးခဲ့သည့် ကေအိုင်အို ဟိုင်ပင်ရုံး
မိုင်းနင်းမိသူများကို အကူအညီပေးရင်း မိုးညှင်းဆေးရုံတွင် ဆေးကုနေသူကို တွေ့ရန်အသွား လမ်းတွင် ဗိုလ်ကြီးခေါင်လွမ်း အဖမ်းခံရကာ ဟိုပင်ရုံးမှ နှစ်ဦးကိုမူ ရဲနှင့် စစ်ဖက်ဆိုင်ရာ လုံခြုံရေးတပ်က ဖမ်းသွားခဲ့သည်။
ယခုလ ၁၇ ရက်က မိုးညှင်းမြို့နယ် ကေအိုင်အို နယ်မြေတွင်းက နွားလပို့တောင်ထိပ်၌ မိုင်းနင်း၍ သေဆုံးဒဏ်ရာရသူများ ရှိခဲ့ရာ လူလူချင်းစာနာမှုအရ ထောက်ပံ့ငွေ ပေးရန် လူနာများထံ သွားကြည့်ရန် ဗိုလ်ကြီးခေါင်လွမ်း ဟိုပင်မြို့ စစ်ဖက်ရေးရာ လုံခြုံရေးတပ်ဖွဲ့သို့ သတင်းပို့ခဲ့သေးသည်။
ယနေ့နံနက် ၁ နာရီတွင် ဒုရဲမှူးကြီးဝင်းဦး၊ စရဖ တပ်ဖွဲ့မှ ဗိုလ်ကြီးကျော်စိုးမိုးစသည့် လူ ၃ဝ ကျော် ကေအိုင်အို ဟိုပင်ရုံးတွင်း ဝင်လာကာ ၄ နာရီကြာ စစ်ဆေးပြီး Icom အမျိုးအစား ဆက်သွယ်ရေးစက်တလုံး ယူသွားကြသည်။
“ဟိုပင်က ရဲနဲ့ စရဖ တွေ အားလုံး ၁ဝ ယောက်လောက် ပါတယ်။ ရပ်ကွက်လူကြီးတွေလဲ ပါတယ်” ဟု ကေအိုင်အို အရာရှိက ပြောသည်။ ထို့ပြင် ကေအိုင်အို၏ ဟိုပင်နှင့် မိုးညှင်း ဆက်ဆံရေးရုံးဖုန်း ၂ ခုစလုံး လိုင်းဖြတ်ခံထားရသည်ဟု ဆိုသည်။
မနေ့ညကပင် ကေအိုင်အိုက မြောက်ပိုင်းတိုင်း စစ်ဌာနချုပ် လက်အောက် လဂျားယန်တပ်ရင်း ခလရ ၁၄၂ ရှိ စရဖ ခေါင်းဆောင်များကို ကေအိုင်အို အရာရှိများ ဖမ်းဆီးမှုနှင့်ပတ်သက်၍ ဖြေရှင်းရန် ပြောခဲ့သေးသည်။
မိုးညှင်းရှိ ကေအိုင်အို ဆက်ဆံရေးအရာရှိ ဒုအရာခံဗိုလ်တန်ဂွန်းသည် မိုးညှင်းရဲစခန်း လိုက်သွားပြီး မည်သည့်အတွက် ဖမ်းဆီးရသည်ကို မေးမြန်းစဉ် ရဲအရာရှိများက အထက်ညွန်ကြားချက် ရမှ လွှတ်ပေးမည်ဟု တုံ့ပြန်ပြောဆိုခဲ့သည်။
သို့သော် မနေ့ ညနေ ၄ နာရီခန့်က မိုးညှင်းမြို့ ရပ်ကွက်လူကြီးများကို ခေါ်၍ ဗင်ကားကို စစ်ဆေးရာ ကားနောက်တွင် ဘိန်း ၄ တောင့် တွေ့သဖြင့် မူးယစ်ဆေးဝါးမှုဖြင့် တရားစွဲရန် စီစဉ်နေစဉ် ဗိုလ်ကြီးခေါင်လွမ်းနှင့် ဒုအရာခံဗိုလ်တို့ ကိုယ်လွတ်ထွက်ပြေးသွားခဲ့သည်ဟု မပခ က ဖုန်းဖြင့် ပြောသည်။
ဗိုလ်ကြီးခေါင်လွမ်းသည် မူးယစ်ဆေးသုံးသူ မဟုတ်သဖြင့် အာဏာပိုင်များက တမင်ဖန်တီးကာ ဖမ်းရန် ကြံစည်ခဲ့ကြောင်း ကေအိုင်အို အရာရှိက ဆိုသည်။
“အဲဒီဗိုလ်ကြီးက ဘိန်းသောက်တဲ့ လူတွေကို လုံးဝ မကြိုက်ဘူး။ ဆေးလိပ်လဲ မသောက်ဘူး။ သူ့ကားမှာ ဘိန်းတွေ့တယ်ဆိုတော့ အံ့သြစရာပဲ။ အစိုးရက ဒီလို မမှန်မကန်လုပ်တာ အခုမှ မဟုတ်ပါဘူး” ဟု သူက ပြောသည်။
ကေအိုင်အိုကို စစ်ရေးအရ တိုက်ခိုက်ရန် ဖွဲ့စည်းထားခြင်း မဟုတ်ဘဲ ရသင့်ရထိုက်သော အခွင့်အရေး ရရှိရန် ဖွဲ့စည်းထားခြင်းဖြစ်၍ စတင်ပစ်ခတ်မည်မဟုတ်ဟု ကေအိုင်အိုက ပြောဆိုထားသည်။
နယ်ခြားစောင့်တပ် အသွင်မပြောင်းသဖြင့် ကေအိုင်အိုကို စစ်ရေးအရ တိုက်ခိုက်ရန် အကြောင်းပြချက်အဖြစ် ယခုလို သွေးတိုးစမ်းကြောင်း ထိုင်းနိုင်ငံရှိ ဒီမိုကရေစီနှင့် ဖွံ့ဖြိုးတိုးတက်ရေး အင်အားစု သုတေသနဌာနမှ မြန်မာ့အရေးလေ့လာသူ ဦးဌေးအောင်က သုံးသပ်သည်။
“အပစ်ရပ်အဖွဲ့တွေထဲက ကေအိုင်အိုကို အငြိုးတကြီးနဲ့ လုပ်နေတာပဲ။ မြစ်ဆုံဗုံးပေါက်ကွဲတဲ့ကိစ္စ၊ အခုကိစ္စတွေကို အစိုးရအနေနဲ့ ဒီလိုအကြောင်းပြစရာ ကောင်းကောင်းပေါ်လာရင် စစ်ရေးအရ နှိမ်နင်းဖို့၊ အရေးယူဖို့ လုပ်နေတယ်လို့ ယူဆရတယ်။ လတ်တလောဖြစ်နေတဲ့ ဗုံးခွဲတဲ့ ကိစ္စဆိုတာက သူတို့အတွက် အကြောင်းပြဖို့ ရှိတယ်။ ဒါကြောင့်တိုက်တယ်ဆိုပြီး နိုင်ငံတကာကို အကြောင်းပြလို့ ရမယ်လေ။ ရွေးကောက်ပွဲပြီးရင် အရပ်သားအစိုးရအဖွဲ့ အမိန့်ပေးလို့ တိုက်ရပါတယ်ဆိုတာမျိုး ဖြစ်လာမယ်လို့ ယူဆတယ်” ဟု သူက မဇ္စျိမကို ပြောသည်။
