စက်တင်ဘာလ ၂၉ ရက်၊ ၂ဝဝ၇ ခုနှစ်။
ကချင်ပြည်နယ် မြို့တော် မြစ်ကြီးနားနှင့် ဝိုင်းမော်၊ ဗန်းမော်၊ မိုးကောင်း မြိုများမှ လူထုအင်အား ၂ သောင်းကျော်ကို မတက်မနေရ တက်ရောက်ခိုင်းသည့် နအဖ အမျိုးသား ညီလာခံ ထောက်ခံပွဲ အခမ်းအနားကို ယနေ့နံနက် ၇ နာရီခွဲက မြစ်ကြီးနားမြို့ ဘောလုံးကွင်းတွင် ပြုလုပ်ခဲ့ရာ ရုပ်ပျက်ဆင်းပျက်ဖြစ်ကာ ပြီးဆုံးသွားခဲ့သည်။
မြန်မာနိုင်ငံအနှံ့ သံဃာတော်များနှင့် ပြည်သူများ၏ အစိုးရ ဆန့်ကျင် ဆန္ဒပြပွဲများ အပေါ် ရှုတ်ချသည့် အဆိုများကို ဗိုလ်ချုပ် သိန်းဇော် ဆိုသူက တင်သွင်းရာတွင် အခမ်းအနား တက်ရောက်သူ အားလုံးက 'ထောက်ခံပါတယ် … ထောက်ခံပါတယ်' ဟု ဟစ်အော်ရမည့် အစား 'ဒို့အရေး … ဒို့အရေး' ဟူ၍ သံပြိုင် ကြွေးကြော်ကြကြောင်း ဒေသခံများ အဆိုအရ သိရသည်။
“ပွဲစတာနဲ့ သဘာပတိက အဖွင့်မိန့်ခွန်း ပြောတယ်။ ပြီးတာနဲ့ အချက် ၁၁ ချက်ပါတဲ့ အဆိုကို ဗိုလ်ချုပ်သိန်းဇော် က တင်သွင်းတယ်။ 'ပြည်ပအားကိုး ပုဆိန်ရိုး … အဆိုးမြင် ဝါဒီများအား ဆန့်ကျင်ကြ' လို့ တိုင်ပေးတယ်။ သူတို့ ကြံ့ဖွတ်တွေရော အားလုံးက 'ဒို့အရေး … ဒို့အရေး' လို့ပဲ ဝိုင်းအော်ကြတယ် ခင်ဗျ” ဟု ညီလာခံ တက်ရောက်သူ မြစ်ကြီးနား မြို့ခံက မဇ္ဈိမကို ပြောပြသည်။
ယခုလို 'ဒို့အရေး … ဒို့အရေး' ဟု ဝိုင်းအော်ကြသဖြင့် အဆိုတင်သွင်းသူ ဗိုလ်ချုပ် သိန်းဇော်သည် မျက်စိ မျက်နှာပျက်ကာ စင်ပေါ်မှ ဆင်းသွားကြောင်းနှင့် ညီလာခံ ထောက်ခံပွဲ အခမ်းအနား ပြုလုပ်ချိန်တွင် ဘောလုံးကွင်း တံခါးများကို အလုံပိတ်ထားပြီး လက်နက်ကိုင် လုံခြုံရေးများလည်း ထူထပ်စွာ ချထားကြောင်း သိရသည်။
“မြစ်ကြီးနားက လူတွေက မနက် ၅ နာရီကတည်းက လာကြရတာ။ ခယက ရုံးမှာ တန်းစီရသေးတယ်။ အဲဒါပြီးမှ ဘောလုံးကွင်းကို သွားရတာ။ ကျန်တဲ့မြို့က လူတွေကလည်း ညကတည်းက ကားစီးလာရတာလေ။ ဗိုက်ကလည်း အရမ်းဆာနေကြတော့ ပွဲတောင် မပြီးသေးဘူး ပိတ်ထားတဲ့ တံခါးတွေကို ဖွင့်ခိုင်းပြီး အားလုံးက ဝုန်းဝုန်းဆို ထွက်လိုက်ကြတာ။ လူတွေနင်းကြတယ်၊ ဒဏ်ရာရကြတဲ့ သူတွေလည်း ရှိတယ်ခင်ဗျ” ဟု အခြား ဒေသခံ တဦးကလည်း ပြောသည်။
ဗန်းမော်မြို့မှ ဌာနဆိုင်ရာ ဝန်ထမ်းများ၊ ကြံ့ဖွံ့များကို မှန်လုံကား ၄ စီးဖြင့် ယမန်နေ့ည ၁၁ နာရီကတည်းက မြစ်ကြီးနားသို့ ပို့ဆောင်ခဲ့ခြင်း ဖြစ်သည်ဟု ဗန်းမော် မြို့သားတဦးက ပြောသည်။
“ဝန်ထမ်းတွေက မသွားချင်ဘူး။ အကုန်လုံး အတင်းအကျပ်ပဲ။ မလိုက်ရင် အလုပ်ဖြုတ်မယ် ဆိုပြီး ခြိမ်းခြောက်ပြီး သွားတက်ခိုင်းလိုက်တာ” ဟု သူက ပြောပြသည်။
ယနေ့ ကျင်းပသည့် မြစ်ကြီးနားက ညီလာခံ ထောက်ခံပွဲ အခမ်းအနားသို့ အိမ်ထောင်စု တစုလျှင် ၂ ဦးကျ နှုန်းဖြင့် မတက်မနေရ တက်ရောက်ခိုင်းခဲ့ခြင်း ဖြစ်သည်။
လွန်ခဲ့သည့် ၁၄ နှစ်ကျော်ကတည်းက နိုင်ငံတော် ဖွဲ့စည်းပုံ အခြေခံ ဥပဒေ ရေးဆွဲလာခဲ့သော မြန်မာ စစ်အစိုးရ၏ အမျိုးသား ညီလာခံသည် မြန်မာ အတိုက်အခံများ၊ တိုင်းရင်းသား အင်အားစုများ၏ သဘောတူ ကြည်ဖြူမှု မရှိဘဲ ပြီးခဲ့သည့်လ ၃ ရက်နေ့တွင် အဆုံးသတ်ခဲ့ပြီး ဖြစ်သည်။
