အမေရိကန် အခြေစိုက် Best Westernကုမ္ပဏီ မြန်မာတွင် ဟိုတယ်များ ဖွင့်မည်

မဇ္ဈိမ သတင်းဌာန | ကြာသပတေးနေ့၊ ဖေဖေါ်ဝါရီလ ၀၇ ရက် ၂၀၁၃ ခုနှစ် ၁၄ နာရီ ၃၉ မိနစ်

အမေရိကန် အခြေစိုက် ဟိုတယ် လုပ်ငန်း အုပ်စု ဖြစ်သည့် Best Western International Inc သည် ယခုနှစ်ထဲတွင် မြန်မာနိုင်ငံသို့ ဟိုတယ် လုပ်ငန်း ဝင်ရောက် လုပ်ကိုင်မည် ဖြစ်ကြောင်း ကြေညာခဲ့သည်။

Best Western International Inc ၏ ဘန်ကောက် အခြေစိုက် ဌာနမှ အာရှနှင့် အရှေ့အလယ်ပိုင်း ဆိုင်ရာ လက်ထောက် ဥက္ကဌ Glenn de Souza က Bloomberg သတင်းဌာနသို့ email ဖြင့် ပြောကြားရာတွင် Best Western International Inc အနေဖြင့် မြန်မာနိုင်ငံ၏ အကြီးဆုံး မြို့ ၂မြို့ ဖြစ်သည့် ရန်ကုန် နှင့် မန္တလေးတို့တွင် ဟိုတယ်များ ဖွင့်လှစ်ရန် စဉ်းစားနေသည်ဟု ဆိုထားသည်။

“ဟိုတယ် ကဏ္ဍမှာ ဟိုတယ်အခန်းတွေ အလွန်အမင်း ပြတ်လပ်နေပါတယ်။ အထူးသဖြင့် အလတ်စား ဟိုတယ်တွေပါ။ ဒါကြောင့်မို့ ပထမဆုံး ဝင်ရောက် လုပ်ကိုင်သူတွေ အတွက် ကြီးမားတဲ့ အခွင့်အလမ်းတွေ ရှိနေပါတယ်” ဟု Glenn de Souza က email ထဲတွင် ရေးသားခဲ့သည်။

ယခုနှစ် ဒီဇင်ဘာတွင် မြန်မာနိုင်ငံ၌ လက်ခံကျင်းပမည့် အရှေ့တောင်အာရှ အားကစား ပြိုင်ပွဲတွင် ဟိုတယ်အခန်းများ လုံလောက်စေရေးအတွက် အားကစားပွဲ မတိုင်မီ အချိန်ကာလအတွင်း ၂၀၀ ဧကခန့် ကျယ်ဝန်းသည့် ဟိုတယ်ဇုန် တခုကို ရန်ကုန်တွင် တည်ထောင်မည် ဖြစ်ကြောင်း
မြန်မာ အစိုးရက ကြေညာထားသည်။

ရှန်ဂရီလာ နိုင်ငံတကာ ဟိုတယ် စီမံခန့်ခွဲရေး လိမိတက် [Shangri-La International Hotel Management Ltd] အနေဖြင့်လည်း  ရန်ကုန်မြို့ရှိ ကန်တော်ကြီး ပတ်လမ်းတွင် ဟိုတယ်နှင့် အဆင့်မြင့် ဇိမ်ခံ တိုက်ခန်းများ တည်ဆောက်လျက် ရှိသည်။