၅ ကြိမ်မြောက် ဘာလီ ဒီမိုကရေစီဖိုရမ် စတင်နေ

မဇ္ဈိမသတင်းဌာန | ကြာသပတေးနေ့၊ နိုဝင်ဘာလ ၀၈ ရက် ၂၀၁၂ ခုနှစ် ၁၅ နာရီ ၀၉ မိနစ်

မဇ္ဈိမသတင်းဌာန ။          ။ ပဉ္စမအကြိမ်မြောက် ဘာလီ ဒီမိုကရေစီဖိုရမ် ဆွေးနွေးပွဲကို အင်ဒိုနီးရှားနိုင်ငံ၊ ဘာလီ၌ နိုဝင်ဘာလ ၈ ရက်နေ့မှတင်၍ ကျင်းပနေသည်။

နှစ်ရက်တာ ကျင်းပမည့် အဆိုပါဖိုရမ်သို့ နိုင်ငံပေါင်း ၈ဝ ကျော်မှ နိုင်ငံ့ခေါင်းဆောင်များနှင့် ကိုယ်စားလှယ်များ တက်ရောက်ကြပြီး ခြောက်ဦးပါ မြန်မာကိုယ်စားလှယ်အဖွဲ့အား ဒုတိယ
နိုင်ငံခြားရေးဝန်ကြီး ဦးသန့်ကျော် က ဦးဆောင်၍ တက်ရောက်နေသည်။

အင်ဒိုနီးရှားနိုင်ငံ ဘာလီ ၌ နိုဝင်ဘာ ၈ ရက်နေ့နှင့် ၉ ရက်နေ့များတွင် ပြုလုပ်ကျင်းပနေသည့် ၅ ကြိမ်မြောက် ဘာလီ ဒီမိုကရေစီဖိုရမ် ဆွေးနွေးပွဲ အဖွင့်တွင် နိုင်ငံပေါင်း ၈၀ ကျော်မှနိုင်ငံ့ခေါင်းဆောင်များနှင့် ကိုယ်စားလှယ်များအား တွေ့ရစဉ်။ (ဓာတ်ပုံ - မဇ္ဈိမ)

သြစတြေးလျ ဝန်ကြီးချုပ် Julia Gillard၊ အာဖဂန်နစ္စတန် သမ္မတ Hamid Karzai ၊ တောင်ကိုရီးယား သမ္မတ Lee Myaung-Bak ၊ ထိုင်းဝန်ကြီးချုပ် Yingluck နှင့် အရှေ့တီမော ဝန်ကြီးချုပ် Xanana Gusmao တို့ အပါအဝင် နိုင်ငံ အကြီးအကဲ စုစုပေါင်း ၁၁ ဦးလည်း ပါဝင်တက်ရောက်လျက် ရှိသည်။

ဘာလီ ဒီမိုကရေစီ ဖိုရမ်၏ အဓိက အာဘော်မှာ “တကမ္ဘာလုံးဆိုင်ရာ ချိန်ညှိချက်ဖြင့် ဒီမိုကရက်တစ် စည်းမျဉ်းစည်းကမ်းများ တိုးတက်ပြန့်ပွါးအောင် လုပ်ဆောင်ခြင်း” ဟူ၍ ဖြစ်သည်။