Thursday, August 4, 2011

ဘိုးဘွားရိပ်သာ ရန်ပုံငွေပွဲ ဇေယျာသော် သီချင်းမဆိုရ

ဖနိဒါ| ကြာသပတေးနေ့၊ သြဂုတ်လ ၀၄ ရက် ၂၀၁၁ ခုနှစ် ၁၅ နာရီ ၄၅ မိနစ်

ချင်းမိုင်(မဇ္စျိမ) ။      ။ အတိုက်အခံ ဟစ်ဟော့အဆိုတော် ဇေယျာသော်ကို ရန်ကုန်မြို့ မင်္ဂလာတောင်ညွန့် မြို့နယ်တွင် ပြုလုပ်မည့် ဘိုးဘွားရိပ်သာ ရန်ပုံငွေအတွက် စင်မြင့်ဂီတဖျော်ဖြေပွဲတွင် ပါဝင်သီဆိုခြင်း မပြုရန် ရဲက ပိတ်ပင်လိုက်သည်။

လူငယ်အဆိုတော်များ ပူးပေါင်း၍ ဘိုးဘွားများ ရန်ပုံငွေရှာရေး ဂီတဖျော်ပြေပွဲကို လာမည့် စနေနေ့တွင် ကန်တော်ကြီး မျှော်စင်ကျွန်းတွင် ပြုလုပ်ရန် စီစဉ်ထားရာ ပွဲမိန့်ကျပြီးသော်လည်း ပွဲစီစဉ်သူများကို မင်္ဂလာတောင်ညွန်မြို့နယ် ရဲစခန်းက ခေါ်ယူ၍ ဇေယျာသော် မပါအောင် တားမြစ်ခြင်း ဖြစ်သည်။
ဆည်းဆာရိပ် ဘိုးဘွားရိပ်သာမှာ နာရေးကူညီမှု အသင်း အတွင်းရေးမှူးလည်းဖြစ်သူ စာရေးဆရာမ ဒေါ်သန်းမြင့်အောင်က ဦးစီး ဖွင့်လှစ်ထားသည့် ရိပ်သာ ဖြစ်သည်။

“ဇေယျာသော် သီဆိုမယ်ဆိုရင် ပါမစ်ပြန်သိမ်းရပါမယ်။ အဲဒီတော့ ပွဲစီစဉ်တဲ့သူတွေက သူတို့မှာ ဂီတအစည်းအရုံးက ပိတ်ပင်ထားတဲ့ စာတွေက မရှိဘူး။ ဘယ်အဖွဲ့အစည်းက ပိတ်တယ်လို့ ပြန်မေးတော့ အထက်က ပိတ်ခိုင်းတဲ့ အတွက်ကြောင့်မလို့ သူတို့ ပြောလို့ မရပါဘူးဆိုပြီး ပြန်ဖြေတယ်တဲ့” ဟု ကိုဇေယျာသော်က မဇ္စျိမကို ပြောသည်။

ပွဲအစီအစဉ် မပျက်လိုသည့် အတွက် သုံးနှစ် အကျဉ်းချခံခဲ့ရသော အသက် ၃၁ နှစ်အရွယ် နိုင်ငံရေး အကျဉ်းသားဟောင်း ပါဝင်ဖျော်ဖြေခြင်း မပြုပါဟု ကတိလက်မှတ် ရေးထိုးခဲ့ရသည်။

“လက်ရှိ အခြေအနေမှာကတော့ မိမိကို မိမိလည်း ဒီမိုကရက်တစ် အစိုးရတရပ်လို့ ကြေငြာထားတဲ့ အတွက်ကြောင့် အခုလုပ်တဲ့ ဖြေရှင်းတဲ့ ပုံစံမျိုးနဲ့ မပြတ်သွားပါဘူး။ ဒါကြောင့် ကျနော့်ကို ဒီလိုပိတ်ပင်တယ် ၊ တားဆီးတယ်ဆိုတာကို ဘယ်သူက ပိတ်ပင်တယ်။ ဘာကြောင့် ပိတ်ပင်တယ်၊ ဘယ်အဖွဲ့အစည်းက ပိတ်ပင်တယ်ဆိုတဲ့ တိကျတဲ့ တာဝန်ယူမှု၊ တာဝန်ခံမှုတွေ ရှိရပါမယ်”ဟု ကိုဇေယျာသော်က ပြောသည်။
အသက်ကြီး၍ မိသားစုက စွန့်ပစ်ထားခြင်း ခံရသည့် သူများ၊ မိသားစုမှ မကျွေးမွေးနိုင်သဖြင့် လမ်းဘေး၌ စွန့်ပစ်ခံထားရသူ စသည့် ဘိုးဘွားများကိုသာ ရွေးချယ်ပြီး ထိန်းသိမ်း စောင့်ရှောက်ထားသော ဆည်းဆာရိပ်တွင် ဘိုးဘွားစုစုပေါင်း ၂၄ ဦးရှိပြီး အသက် ၇၀ နှစ်ကျော်မှ ၉၀ နှစ်ကျော်များ ဖြစ်သည်။

“လိုနေတာက အဆောက်အဦးတခု ထပ်ဆောက်တယ်။ ရန်ပုံငွေ အများကြီးမှ မရှိဘဲ။ ဂီလာနတွေ ဖြစ်နေတော့ ကျန်းမာရေး စရိတ်တွေက ပိုကုန်တယ်။ အဲဒီအတွက် ပိုလိုအပ်နေတာပါ”ဟု ရိပ်သာ၏ တွဲဘက် အတွင်းရေးမှူးဖြစ်သူ စာရေးဆရာမ ဒေါက်တာထားထားက မဇ္စျိမကို ပြောသည်။
 

Mizzima Burmese Copyright © 2011 | Template design by O Pregador | Powered by Blogger Templates